کولمبو میں جاری ورلڈ یوتھ اسکریبل چیمپئین شپ کے پہلے دن پاکستانی کھلاڑی چھائے رہے، پہلے روز کے اختتام پر ٹاپ 10 میں 6 پاکستانی کھلاڑی شامل ہیں۔
ورلڈ یوتھ اسکریبل چیمپئن شپ میں 12 سالہ احمد سلمان تمام 8 گیمز جیت کر پہلی پوزیشن پر ہیں، احمد سلمان ایونٹ میں شریک تمام 138 پلیئرز میں واحد ناقابل شکست پلیئر ہیں۔
پاکستان ہی کے 16 سالہ عفان سلمان 7 گیمز جیت کر دوسری پوزیشن پر براجمان ہیں، بھارت کے مادھو کامت نے تیسری پوزیشن پر قبضہ کررکھا ہے۔
پاکستان کے احزم احمد 7 گیمز جیت کر چوتھے نمبر پر ہیں جبکہ بلال اشعر پانچویں، منال اشعر چھٹے اور محمد یادان 10 ویں نمبر پر ہیں۔
سائیڈ ٹورنامنٹ میں پاکستان کے وسیم کھتری ٹاپ پوزیشن پر ہیں، وسیم نے پہلے روز 7 میں سے 6 گیمز میں حریفوں کو مات دی۔
ورلڈ یوتھ اسکریبل چیمپئین شپ کے دوسرے روز 9 گیمز کھیلے جائیں گے۔
